أجمل ما في الخطوبة العزومات الرومانسية فى أحلى المحلات واللي عمرك مانتي شايفاها بعد الجواز . المهم نصائحي لك عند أي عزومة مع خطيبك الرقَّه فى كل حاجة .
الأول لازم تعرفي إن الشوكة والسكينة بيتمسكوا من إيديهم من الطرف يعني مش من الوسط ولا من البوز زي الخنجر ولا من فوق طبعًا .
العيش ... أوعي تفضحينا وتقطعيه بسنانك . ولا الرغيف نصين بأيدك وكل نص لقمة وتحشري.. أوعي.. العيش بيتقطع بالسكينة ف الطبق.. وبعدين تاخدي لقمة.. لقمة.. بالعافية.. قال يعني نفسك مسدودة.. اضغطي على أعصابك جدااا وبعدين لما تروَّحي.. إبقي حِفِّي زي مانتِ عايزه....
الشوربة ... بند الشوربة ده مهم جدًاااا.. أبوس ايدك الشوربة تتشرب من غير صوت خالص ومن غير ماتقعدي تنفخي فيها زي القهوجي اللي بينفخ فى الحجر الشيشة للزبون .. وطبعًا عايزك تنسى تمامًا السلطانية اللي بترفعيها على بقك فى البيت وتفضلى وتدلدقي على نفسك .. تشربى بالمعلقه وبدون صوت.. سخنة ولعة برضه بدون صوت.. وتسيبي تلت الطبق على الأقل. . مش تميليه.. عشان تلهطيها لآخر نقطة .
الرز طبعاً .. بيتاكل بالشوكة .. أوعي إيدك تتمد على المعلقة وتغرفي من طبق الرز وتعبي .. إوعي .. الرز بالشوكة وكأنك بتبوسيه مش بتاكليه.
المكرونة الاسباكتي .. برضه بالشوكة.. تتلف على طرف الشوكة.. لحد ما تخلص وبعدين تحطيها فى بقك من سكات .. مش تشفطي المكرونة عود عود.
السمك.. مشكلة.. شوفي.. بتفصلي اللحم عن الشوك إزاي؟ تقطعي السمك من النص بالطول وبعدين تفردي اللحم على الجانبين ولما تخلصي ناحية.. متقلبيش السمكة.. بلاش فلاحة.. شيلي السلسلة بالشوكة والسكينة وحطيها فى جنب الطبق وكملي أكل النص التاني .. وبدل الفيلم الهندي ده .. نصيحة.. ماتكليش السمك خالص .. قولي مابحبش السمك وخلصي نفسك.
الجمبري .. إذا كنتي عارفاه.. أول ماطبق الجمبري ينزل.. بصيله بقرف واحتقار شديد .. قال يعني زهقانة من كتر أكل الجمبري فى بيت بابا.. وإتنهدي جامد وقولي برضه جمبرى ؟؟ وتروحي قاطعة راس الجمبريياية بالشوكة .. أنا فى عرضك إنسي المصمصة دلوقت.
البطاطس سواء مسلوقة أو محمرة .. أوعي تهرسيها وتدبيها على الرز وتدي . لا .لآ .لآ . بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي..
الفاكهة.. لو الفاكهة فيها بذر.. طلعيه من بؤك بالراحة وحطيه ف إيدك وهي مقفولة.. وبعدين ف طفاية السجاير اللي ع الترابيزه.. أوعي ياحبيبتي من نظام التفتفة للبذر.. إنسي....
ولما تخلصي أكل تحطي إيدك على بطنك .. اللي عصافيرها بتصوصو من العينات اللي كلتيها..وتقولي له مش ممكن .. أنا عمري ما اتفجعت كدة.. أنا أودامي أسبوع هابطل أكل فيه ..... وبعدين تمسكي الفوطة اللي دايمًا موجودة ع التربيزة من غير لازمة.. وتبوسيها.. آل يعني بتمسحي بؤك.. وبعدين تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك.. لفة الفول والطعمية اللي جايباها معاكي.. وبالهنا والشفاااااااااااا
************************
أبــو يــاسـمــيـــن
